政情：潘佩璆踩葉劉地盤
未來兩年有五個大型選舉，多個黨派都開始搏命揼石仔，為求爭多一個議席得一個。盛傳躍躍欲試落港島挑戰地區直選嘅工聯會立法會議員潘佩璆，就打算喺南區華富邨附近開第二個議員辦事處，務求多啲服務當區街坊。潘醫生話華富有個特點，就係基層同中產嘅分布平均，又多現任或退休公務員，對主打公務員市場、本身又喺工會出身嘅佢比較有利。不過，公務員、中產、基層選民，統統都係新民黨主席葉劉淑儀嘅目標對象，潘醫生唔通想殺入葉劉地盤搶票？
雖然工聯會未試過喺港島區出直選，但佢哋計過條數，僅喺港島區就有七至八萬個會員，如果當中有一半出嚟投票，已經好和味。不過，潘醫生話工會唔同政黨，會員冇咁大服從性，所以條數未必可以咁計。不過佢話自己既係專業人士、又代表工會聲音，相信都可以爭取到基層同中產支持。嚟緊工聯會計劃派多啲樁腳落港島參選區議會，但講到立法會直選，議席僧多粥少，佢話就要先評估勝算再決定去向。