政情：九龍社團聯會搵到大水喉
區議會及立法會選舉將於未來兩年舉行，各大政黨或社團都忙緊搵人參選同撲水籌募競選經費。我哋早前曾經講過，獲增補為全國政協委員嘅九龍社團聯會理事長王惠貞滿腹大計，牽頭喺地區成立逾五千人嘅「九龍義工團」，雖然佢多番強調與選舉無關，但近日就傳出佢哋搵到大水喉，全力支持聯會活動，嚟緊嘅區議會選舉，肯定將有一番龍爭虎鬥。
張國榮組九龍慈善基金
廣東社團總會大前日舉行會員大會，身為會員嘅建滔化工集團主席張國榮透露，嚟緊佢會成立一個「九龍慈善基金」，其中一項任務，係用作支援內地來港嘅新移民，另一項任務就係資助有志從政嘅青年人參選區議會。知情人士話，呢個基金已得到社團知名人士泵水注資，其中廣東社團總會主席王國強同金利來集團副主席曾智明各捐出一百萬元，計埋其他唔同數目嘅捐款，該基金目前已籌得逾一千萬元，下月仲會隆重其事舉行成立典禮。
據聞基金由創會人張國榮擔任會長，王國強同曾智明等就做副會長。有消息話，基金成立目的，係支持九龍社團聯會嘅地區工作，湊巧聯會早前成立咗個五千人義工團，真係夾都無咁啱。正如張國榮所言，基金將支持有志參選區議會嘅年輕人，這勢必擴大聯會喺九龍各區嘅政治勢力及影響力。
近年建制派嘅政治光譜愈來愈闊，好似以前為民建聯抬轎嘅工聯會及新界社團聯會，都計劃自己棟支旗出嚟參選，唔再為他人作嫁衣裳。雖然九龍社團聯會名氣未必及工聯會及新界社團聯會大，但喺九龍東及九龍西起碼手握十五票，一直喺背後為理念相近嘅建制派候選人默默發功助選；如果佢哋借助基金打正聯會名義參選，諗住靠聯會畀票食胡嘅建制派中人就要自求多福喇！