中環出更：曾智雄葉振都做個好老公
香港各界青少年系列活動執行主席曾智雄同香港志願者協會主席葉振都兩位愛妻號，尋日出席「飲水思源『母親水窖』」香港站活動，仲一齊欣賞只有十歲嘅形象小使者豆豆唱歌。曾智雄囡囡依家五個月大，所以今年將會係佢哋一家三口第一個聖誕節，難怪佢話幾忙都要安排一份特別禮物送畀太太，咩禮物咁特別？之唔係「此刻無價」囉。
智雄平時忙到飛起，難得聖誕可以抖番幾日，佢話一定要畀太太過番一啲正常人過嘅生活，就係陪太太行街睇戲食飯，將自己幾日假期嘅時間畀晒太太，真係聽見都覺得sweet。
許曉暉帶囡囡探老人
至於葉振都，公職同生意都係一樣咁忙。早前佢帶完自願者團隊上廣州忙完亞運返嚟，跟手又要籌備今次活動，所以佢同智雄一樣，聖誕節無論如何都要用嚟陪做醫生嘅太太同兩個小朋友。同場仲有好媽媽民政事務局副局長許曉暉（Florence）同女童軍總會國際總監李周美枝。
Florence話聖誕節會同兩個囡囡去老人院探訪，仲會整曲奇餅送畀長者，不過佢話今次一定會小心啲，唔會再燙親手。李太就話會同屋企人一齊去旅行，依家喺東南亞做嘢嘅細仔都會一齊去，一家人齊齊整整過聖誕。