中環出更：菁英會新血玩轉聖誕P
每年聖誕節Party多到去唔晒，由青年才俊組成嘅菁英會本周一（二十日）都搞咗個聖誕聯歡晚會。今年菁英會喺灣仔皇朝會筵開十六席，除咗創會會長施榮忻（Jaime）同主席白富鴻呢兩位核心人物坐鎮外，仲有好多「新血」現身，個個一表人才，包括立法會議員林健鋒（Jeffrey）兒子林凱章（Victor）、馬會大董李國棟醫生兒子李民輝、前立法會議員楊孝華兒子楊哲寧等。
林凱章策劃 爸爸撐場
今年聖誕Party由身為新丁嘅第九期學員負責，Victor任籌委會主席，佢話花咗一個月時間準備，最難係搵場地，好多地方都爆場；至於邀請賓客、搵贊助、節目及場地布置等工作，就由同期同學分工，大家鼎力合作。身為爸爸嘅Jeffrey就同中聯辦副主任王志民喺中段突然現身撐場，雖然Victor有爸爸呢支強心針，但仍然好緊張問卓妮晚會有乜不足之處，為人踏實謙虛，Jeffrey飲得杯落。
施榮忻贏「深喉」比賽
Victor係第九期國情研習班學員，同期學員仲有國際青年商會香港總會會長李騰駿、中信資本副總裁栗潛心等，而第十期學員則有李民輝、楊哲寧、康泰旅遊總經理黃進達（Jason）、李張慧美兒子李世傑等，康業信貸快遞行政總裁李根泰就係班長。當晚有個環節，係由第十期學員上台獻唱「龍的傳人」，個個都要靠手上貓紙睇歌詞，幸好無走音，李根泰帶住大家唱歌，唱得又talk得，玩得興起，菁英會副主席莊家彬（Albert）仲上台獻花。
今年Party一如去年舉行啤酒競飲大賽，去年榮登啤酒王嘅Albert自然成為大熱，今年挑戰者係康泰太子爺Jason，鬥快競飲兩大杯啤酒，結果Albert比Jason快一倍時間飲完，大熱蟬聯啤酒王寶座。之後又舉行一項名為「深喉」嘅友誼賽，啤酒沿漏斗漏落長膠喉，再流入參賽者口中，今次由Jaime、楊華勇、司庫吳傑莊及前青聯主席許華傑比併，各人分別與一名女拍檔拍住上，女嘅負責倒酒，結果Jaime及楊華勇最先完成。
雖然Jaime喺「深喉」環節贏咗無獎品，但仍捐出一萬元做壓軸大抽獎，結果江欣庭成為幸運兒。當晚除咗一批新血現身外，仲有好多年輕才俊嚟湊熱鬧，包括蘇開鵬兒子蘇灝、美國家得路集團執董陳家偉等，大家打成一片，相信好快成為菁英會一分子。
卓妮