潮流興低碳生活，但講就容易，實際做起來一啲都唔簡單，尤其係啲商界大孖沙，衣食住行樣樣都講求享受，點樣低碳呢？機場管理局尋日介紹機場減碳排放工作，原來主席張建東（Marvin）同行政總裁許漢忠都有身體力行響應減碳行動，其中Marvin減碳排放能力最強，每逢去中環處理公私務，都會放棄豪華座駕改搭巴士。
Marvin自從幾年前患病痊愈後，每日勤於做運動強身健體，行路都多咗，但估唔到佢為咗低碳多搭巴士。身兼行會成員嘅Marvin話，每逢周二去中環政府總部開行會，或者返辦公室工作，都會選搭新巴3B、12或12A路線，仲自爆攞咗長者卡，享有長者半價優惠，每程只需兩蚊多啲。
記得Marvin兩年前由薄扶林「富林苑」搬到中區堅尼地道「堅麗閣」，上述三條巴士線喺堅麗閣門口都有站，證明Marvin搭巴士無花無假。至於許漢忠嘅減碳方法，就係從日常飲食做起。佢話平時用餐盡量唔好浪費食物，減少廚餘，一切由源頭開始做起，自然可以有效減低碳排放。