政情：周融又想做廣播處長
政府○八年首次公開招聘廣播處長，因為喺第二輪招聘中突然放寬學歷要求、被質疑為無大學學位嘅港台節目主持人周融「度身訂造」而鬧出風波。政府尋日又登報招聘廣播處長，接替明年二月任滿後唔續約嘅黃華麒，但無吸取教訓，同樣寫明如果有十五年傳媒經驗、無大學學位嘅人都可應徵。咁即係話，周融如果唔怕對手強勁，又可玩多次。
政府份新廣播處長招聘廣告，同兩年前嗰份差唔多一式一樣，入職條件都係需要最少十五年擔任高層職位經驗，持有本港大學學位或同等學歷，如果無都得，有十五年傳媒經驗即可；合約期三年，月薪十六萬元，咁吸引，繼助理廣播處長戴健文今月初透露有意申請後，周融尋日亦話，會考慮吓捲土重來應徵。不過，佢哋成功機會有幾大，大家心裏有數啦。
面對為周融「度身訂造」嘅質疑，商務及經濟發展局局長劉吳惠蘭就只係回應話，新廣播處長嘅招聘條件同上次一樣。鬼唔知咩，唔係又點會畀外界質疑又為人度身訂造呢？