政情：謝卓飛回倫敦解鄉愁
普天同慶嘅聖誕節又到啦，如果聖誕節好似呢幾日咁寒冷，節日氣氛肯定更濃厚。來自英國嘅西九文化區管理局行政總裁謝卓飛，就選擇唔喺香港過聖誕，事關佢自從八月來港上任後，一直無返過家鄉倫敦，急不及待趁聖誕假期，返英國解鄉愁。不過臨上飛機前，佢都帶埋三位西九管理局行政總監同傳媒聚吓，算係交足晒功課啦。
身為兩子之父嘅謝卓飛，今年八月隻身飛嚟香港做西九開荒牛，到埗無耐就開始埋首西九第二階段諮詢工作，轉眼返咗四個月工，所以趁聖誕新年長假期返倫敦見屋企人，元旦過後至返香港。
尋日佢同傳媒聚會嘅時候猛咁睇錶，原來佢趕住上機，歸心似箭，睇嚟好掛住屋企人。雖然佢喺香港做咗咁耐嘢，不過謝卓飛無打算喺香港買定聖誕禮物畀兩個囝囝，佢話兩個囝囝已長大，唔使佢買禮物，iPhone、 iPad呢啲潮流科技產物，兩個囝囝更早已擁有，做爸爸嘅都係折現算數。其實一家人共享天倫，有無禮物都唔重要啦！