政情：葉劉座駕連環炒四車
立法會議員葉劉淑儀與前自由黨中常委田北辰「兩虎」牽頭成立新民黨僅兩日，葉劉已經「煞氣」臨門，其白色豪華七人座駕喺立法會停車場「S」形連環炒車。意外發生喺下晝三點幾，葉劉乘座駕抵達立法會後，其司機開車駛離時懷疑不小心將隻腳攝喺油門與腳掣之間，令座駕突然加速衝前三十米，先撞向停泊喺對面嘅藍色平治房車右邊車尾，繼而失控撞向停泊喺右邊嘅三輛私家車車頭。
潘佩璆肉赤嗌報警
四輛「遇害」嘅私家車中，除咗潘佩璆嘅藍色平治房車外，仲有鄉事派張學明嘅七人豪華房車、社民連黃毓民嘅銀色七人車及立法會秘書處高層嘅保時捷跑車。當中以學明嘅座駕最傷，不但撞凹車頭「鬼面罩」，連車牌都撞斷埋，搞到學明嘅司機要借膠紙為車牌做接駁手術。由於學明趕時間離開，未及同葉劉交涉。學明日前因為「生蛇」意外撞親個頭，點知黑到連車頭都撞埋。
意外發生後，潘佩璆見到自己心愛嘅平治座駕花晒，當堂肉都赤埋，不斷觸摸車身「呵」番，又話要報警。其後葉劉親身到停車場視察幾部車嘅「傷勢」後，決定報警處理，並交由保險公司處理賠償維修費事宜，仲話會向受影響嘅車主逐一道歉。雖然葉劉願意賠償，但就黑晒口臉。梗係啦，話晒都係無妄之災嘛！
