政情：棠哥暴廋 主動爆料釋疑
工聯會會長、行政會議成員鄭耀棠最近突然身形消瘦咗好多，臉頰凹陷，健康問題惹人聯想。棠哥尋日自我引爆病情，原來佢兩個月前開始受頸椎移位問題困擾，導致手腳有時麻痹，由於身體不適，加上減少外出應酬食好嘢，體重急速跌磅九公斤，成為新一期政壇瘦身代言人。不過，棠哥人瘦志未消，堅持研究出戰二○一二年「超級區議會」，繼續作勢嚇人。
身兼港區全國人大代表嘅棠哥，一向活躍親中酒會，但近月少咗露面，剛過去嘅星期二，棠哥現身政府總部開行會，佢之前已經連續缺席兩個星期，再露面赫然瘦咗一個碼，唔止小肚腩消失，臉、頸、膊頭都縮咗水，令人奇怪，斷估佢唔會學其他人畀錢瘦身啩？
棠哥突然跌磅兼驚現瘦削V字臉，對城中名媛女星嚟講，真係羨煞旁人，但對政界中人而言，就響起警號，過往唔少曾患重症嘅政圈人士，特徵都係暴瘦。棠哥可能聞到味道，知道忽然消瘦容易惹人誤會，尋日介紹工聯會來年工作大計時，主動爆料話自己患上頸椎移位，掃清外界猜疑。
選超級區會 故弄玄虛
原來棠哥十月初去內地武當山旅行，落山時發覺唔妥，手腳麻痹，經醫生一查，先知平時太少運動，致令頸椎移位，依家定期返廣州做推拿同氣功治療；雖然手有時會痹，但已經好咗好多。
棠哥受傷患困擾，外界最關心嘅係佢仲會唔會出戰「超級區議會」，事關佢月前透露唔排除披甲上陣，但至今未見佢落區，加上依家帶病在身，隨時打退堂鼓。不過棠哥尋日繼續故弄玄虛，不置可否，只係話：「依家全港都有我嘅街板吖！」就係唔肯透露參選意向。
眾所周知，棠哥為人如閒雲野鶴，佢竟然蹚直選渾水，令人難以置信，佢對參選一二年超級區議會問題答到模棱兩可，無非想故布疑陣，繼續嚇人，令直選場上嘅選舉對手無法猜透。做戲做全套，為令呢場部署參選大龍鳳做得逼真，棠哥尋日大談工聯會未來一年大計，包括爭取標準工時、推動關愛長者行動，同埋爭取全民退休保障等，又話工聯會將重點栽培八名第二梯隊，作為選拔出戰一二年直選嘅種子，一派滿腹大計。大家又睇吓一二年嗰陣，棠哥會唔會領軍出征？