中環出更：杜振源娶新抱傳授相處之道

卓妮尋晚都獲邀出席婚宴，去到已見到名人雲集，除咗Simon嘅老友、馬會大董葉澍堃夫婦外，仲有鏞記酒家老闆甘健成、黑石集團大中華區主席梁錦松與伏明霞夫婦、教育局長孫明揚太太鍾小芬、中港照相器材集團主席孫大倫、保良局主席呂鈞堯及副主席鄭錦鐘、自由黨田北俊、立法會議員林大輝及石禮謙，仲有名媛羅寶文及「鯊魚女」陳細潔、影星葉童及夫婿等。

「結婚幾十年未嗌過交」

榮升老爺嘅Simon全場笑容滿臉，佢祝願愛兒同新抱恩愛長久外，仲將自己與太太嘅夫妻之道傳授畀一對新人，提醒世上無人係完美嘅，可能將來大家會看到對方嘅缺點，但謹記「愛」係有兩面嘅，夫妻互相包容才能長久相處。Simon話：「我同太太結婚幾十年都未嗌過交！」問Simon想唔想快啲做爺爺抱孫，佢就話：「當然愈快愈好啦，但都要睇佢哋嘅意願嘅！」

卓妮喺婚宴遇到近期捲入女童軍總監改選風波嘅孫太，佢話孫公冷親病咗未能出席，但佢已經用剩番嘅餸菜炒咗個飯畀孫公做晚餐，孫太講完孫公，當然不忘恭喜一對新人長長久久，兒孫滿堂。講番今次婚宴，無論喜帖請柬、以至婚宴會場布置，Michael同Vivian都經過悉心安排，好似菜單設計，就邀請本港權威紅酒評論家及美食家劉致新設計，以紅酒年份描述一對新人嘅相遇經過及將來，可謂落足心思！

左起：梁錦松與太太伏明霞、葉澍堃夫婦、葉嘅細仔瀚華及女友、大仔瀚林及女友，齊齊赴宴慶賀杜振源娶新抱。 （溫國佳攝）	葉童與夫婿（右二、一）拍拖出席婚宴。	田北俊手中嘅雪茄，其實係朱古力。
林大輝（左）與石禮謙（右）孖住去恭賀杜振源娶新抱。

卓妮