公共醫療系統真係病到神仙都救唔番咯。啱啱至鬧完醫管局轄下醫院幾個月都斷唔到症，累到一位病人小腸壞死，衞生署監管嘅診所又出事，今次係懷疑用發霉針打暈人，問你怕未？
有位長者喺觀塘一間健康中心注射甲乙型肝炎混合疫苗，返到屋企感到頭暈及疲乏，收到診所通知至知疫苗含有沉澱物。長者之前打過一支針冇事，呢次注射之後就覺得唔妥，家人質疑疫苗係發霉針。
懷疑中招嘅長者踢爆，護士注射疫苗嗰陣掛住傾偈，打咗半支就冇打，但冇解釋原因，事後至通知出咗問題。嘩，好兒戲啫！藥劑專家話，沉澱物好可能係玻璃碎、膠粒等雜質，打入體內會令人受感染，真係諗落都驚。
其實，針筒同藥樽都係透明嘅，疫苗有沉澱物，莫講按規定要有兩個護士三查五對，淨係肉眼睇都一清二楚啦。護士睇都懶得睇，照打可也，直頭當注射程序冇到，有冇離譜啲吖？咁鬼兒戲，之前唔知有幾多人中咗招，萬一疫苗真係發霉，呢隻鑊邊個孭先？
更離譜嘅係，衞生署嘅回應又係例牌耍官腔，乜嘢會向供應商了解事件吖、會定時巡查註冊診療所吖，講咗等於冇講。呃鬼咩，如果衞生署真係有監管、有巡查，就唔會鑊鑊新鮮鑊鑊甘喇。護士做嘢心不在焉，疫苗懷疑發霉都唔知，衞生署仲好意思提監管兩個字，面皮都算厚咯。
發霉藥隨時會致命，絕對唔係危言聳聽㗎。舊年瑪麗醫院八名癌症病人懷疑服用受污染嘅降尿酸藥物別嘌醇後死亡，查咗一輪，先至證實呢批係發霉藥，原來藥廠將別嘌醇半製成品儲存多日，令毛霉菌大量孳生，死因庭裁定其中三人感染毛霉菌致死。死者家屬直斥衞生署監管失職，冇為藥物做安全檢測，同幫兇冇乜分別！
別嘌醇慘劇歷歷在目，成為本港公共醫療系統之恥，可惜當局至今仍冇吸取教訓。雖然當局事後提出七十幾項「改善建議」，但所謂改善，純屬吹水，藥物監管依然形同虛設，醜聞陸續有嚟。發霉藥、過期藥、未註冊藥，五花八門乜都有，卒之搞到立法會議員忍無可忍，對衞生署署長林秉恩提出譴責。
弊在醫療庸官根本唔當譴責係一回事，你有你譴責，佢有佢繼續犯錯。呢，上個月有一間曾因藥品成分不足被暫時停牌嘅本港藥廠，被揭發居然喺停牌期間非法生產數十種藥物；話口未完，今次又爆發霉針驚魂。你話嘞，市民對呢班庸官仲邊有信心呀。
食衞局局長周一嶽尋日回應發霉針醜聞，講嚟講去，又係翻查打針紀錄、了解疫苗成分、檢討注射程序三幅被。唉，唔係庸官發瘟，疫苗好地地又點會發霉吖。計功夫茶話齋，周一鑊同林秉恩呢啲庸官如果唔執包袱走人，公共醫療體系遲早發霉、發臭、發爛。