政情：長毛闖關請願頻甩轆
社民連立法會議員長毛梁國雄等七人趁國務院總理溫家寶南下澳門，尋日浩浩蕩蕩諗住去澳門請願。不過出發前佢哋連番甩轆，數錯人、跌船飛，兼且差啲連身份證都唔見埋，搞到負責瞄實佢哋嘅警察忍唔住偷笑。
尋日去澳門嘅社民連同四五行動成員中，長毛、古思堯同阿牛曾健成均屬示威專家，甩轆嘢當然唔關佢哋事。話說買船飛前，佢哋一個個企晒喺度諗幾多人去，結果決定七人成團，負責點人數嘅開始數，一、二、三、四、五、六，數咗兩次都得六個，終於長毛忍唔住同點人數嗰個人講：「你咪第七個囉。」在場瞄實佢哋嘅警察聽到，即時忍唔住竊笑。
卒之買咗船飛可以入閘，又有人話唔記得帶身份證，眾人左摷右摷摷番出嚟，好彩只係虛驚一場。點知呢個時候又有人話張船飛唔見咗，幸而最後喺唔知邊處執番張飛。經過一波三折，佢哋七個終於可以起錨，結果當然係入唔到境啦！
阿牛話，澳門當局嘅處理手法愈來愈文明，事關佢哋被帶入房後，竟然有飲品招呼，手續亦無以前咁繁複，睇嚟已經駕輕就熟。相比之下，同樣去澳門請願嘅支聯會，同澳門邊防人員搞到要拉拉扯扯，佢哋算係獲厚待㗎啦。