政情：項明生爆阿松變阿蟲
身為前財爺嘅國際小母牛香港分會主席梁錦松，原來好幽默。九月底佢同太太伏明霞帶同小母牛嘅捐贈者去河北農村探訪，竟然玩食字自嘲係條大蟲，笑爆全場。Sony PlayStation總經理兼旅遊作家項明生（James）隨團北上，佢本《足足五千年》著作為小母牛籌到五十萬元，今次以善長身份隨行。
James爆料，話有日大家去探訪一戶種番茄嘅農家，阿松隨口問一位做滅蟲生意嘅捐贈者，叫佢睇吓番茄有冇蟲。個團友仔細check過後就話冇蟲，點知阿松爆肚話：「我咁大條蟲喺度，你都睇唔到？」惹得大家捧腹大笑。
James話，今次仲見識到阿松為人真誠嘅一面。好似回港當日路上塞車，成團人趕到北京機場時，距離起飛只剩低半小時，航空公司櫃位已停止辦理登機。多得阿松出面交涉後，櫃位終於重開。但坐頭等艙嘅阿松夫婦無自己登機先，一直企喺櫃位旁邊睇住團友check in，後來有三人因機位滿座未能同機返港，阿松又出面交涉，將團友升級坐商務艙，成團人終於可以一齊走。
葉澍堃唔認係米芝蓮食評家
令James最難忘嘅一刻，係阿松同國寶太太伏明霞與一眾團友一齊狂奔登機，成團人都為阿松嘅真誠拍爛手掌！
同行仲有唔做高官做食神嘅葉澍堃（Stephen），佢呢兩年瞓身幫小母牛吸水籌款，認真唔話得。講開Stephen，最近傳佢做咗米芝蓮食評家，Stephen話無咁嘅事，佢話做食評家一日閒閒哋食幾餐，佢邊有咁多時間呀；仲話即使佢願意，老婆大人都唔肯放行啦！