政情：曾德成申亞擺運動員上枱
自從政府公布申辦二○二三年亞運之後，各大黨派都紛紛表態反對，連一向係政府親密合作夥伴嘅民建聯，今次都唔畀面，一於民意大過天，宣布反對花一百四十五億元舉辦亞運會。眼見計劃流產在即，政府先押後諮詢期一個月，繼而再推出縮水版申亞方案，將直接成本減到六十五億，務求爭取本來反對嘅政黨同市民支持。
民政事務局局長曾德成前日又出新招，竟然聲稱喺必要時向深圳、廣州，甚至澳門借用場地，又會邀請更多商業機構贊助，想盡辦法進一步減低成本。說到底，德成局長都係死心不息，為咗搞得成亞運無所不用其極。
不過即使減省成本，亦唔見得會得到立法會黨派支持。民政事務局常任秘書長楊立門前日上立法會民政事務委員會解畫時，就畀班議員插到飛起，話政府計數兒戲，陷支持申亞嘅議員於不義，搞到好似促銷大平賣咁，相當難睇。雖然四面楚歌，但德成局長繼續死撐，尋日仲趁香港運動員攞金牌嘅機會出嚟抽水。
香港單車運動員李慧詩尋日成功喺亞運奪金，德成局長即時發新聞稿祝賀，之後仲去咗游泳比賽場館為香港運動員同義工打氣。唔止咁，立法會今個月底會搞公聽會，會邀請好多體育界代表出席畀意見，據聞政府仲會發功，請一啲喺國際賽中為港爭光嘅金牌運動員上去支持申亞；總之德成局長為求申亞成功，連運動員都畀佢擺埋上枱。
珊珊表態支持
「風之后」李麗珊尋日同我哋講，佢都聽聞過今次呢個公聽會，但政府仲未正式邀請佢，仲話即使收到邀請，亦要睇吓抽唔抽到時間去喎。不過珊珊都補咗句話，作為前運動員，佢絕對支持申亞喎，都算表咗態。
民建聯黨團有消息指，如果香港運動員喺亞運得到好成績，民意有可能改變，對政黨嘅決定亦有一定影響。德成局長誓要申亞，民建聯作為合作夥伴，都幾難唔支持，點都要搵番個下台階；只係連金牌運動員都擺埋上枱，將佢哋變成政治籌碼，係咪過分咗呢？