政情：和仔：從政興趣不大
坪洲鄉事會街坊代表選舉日前舉行，身兼鄉事委員會主席林偉強被「倒強派」力壓，失勢嘅佢焗住「裸退」。「倒強派」選情報捷，其中首次當選為街坊代表嘅前香港足球先生李健和（和仔）更成眾人焦點，但原來和仔對從政一啲興趣都冇，仲斬釘截鐵咁話對下年三月鄉委會嘅換屆選舉毫無興趣。
和仔日前以九百零三票當選為坪洲鄉事會街坊代表，得票排第五，對初次參選者嚟講成績算唔錯。人人都以為和仔會喺政壇大展拳腳，但原來只係一場美麗的誤會。和仔尋日同我哋講，佢認為坪洲需要一啲新轉變，咁啱又有啲年輕嘅街坊代表向佢招手，佢先參加今次選舉，「講真，我對從政真係興趣不大！」
和仔又話冇興趣問鼎下屆鄉委會嘅正副主席一職，事關認為責任太大，自己既無能力，亦無時間參與。