政情：民政局慳皮請區會睇平騷
電子動態版《清明上河圖》下個月起喺亞洲博覽館展出三星期，唔少市民都想一睹其風采，幾十萬張門票推出幾日就被搶購一空，網上仲出現炒風。民政事務局最近就決定，請全港區議員一齊觀賞《清明上河圖》，點解？咪為咗彌補去唔到廣州亞運嘅缺陷囉。
原來起初有區議員建議，不如組織個考察團去睇亞運開幕禮，等大家都開下眼界，不過民政事務局局長曾德成聽到就耍手擰頭，因為亞運開幕入場券勁貴，最靚位要六千八蚊一張飛，黃牛飛仲炒到兩萬幾。眼見睇唔成亞運開幕，德成局長就提議請所有區議員睇《清明上河圖》，咁又係嘅，買五百幾張飛都平過請一個人睇亞運，抵晒！
民記申亞立場飄忽
而香港係咪申辦亞運仍然存在變數，民建聯雖然話覺得未係適當時候，但依家民記西貢同東區區議員都申請豁免，要求支持申亞。不過民記中委尋日反覆討論後都係維持原判，反對申亞，任何黨員都不得輕易豁免。