政情：立會搬竇「休業」兩周

新機場開幕出現各式各樣甩漏引為國際笑柄，大至貨運站電腦故障令貨物出入境有阻滯，小至投訴廁所標示不清，後來立法會出動尚方寶劍特權法徹查事故，真係何等威風。如今時移勢易，立法會搬家在即，立法會秘書長吳文華（Pauline）尋日同傳媒聚會時話，兩位女議員劉慧卿同埋吳靄儀特別關注立法會搬屋一定要順暢，唔想立法會查新機場嘅時候就識得話人，輪到自己搬屋時又無口話自己。

地方闊落 唔夠保安

有見及此，專責新大樓事務嘅助理秘書長之下特設搬屋小組再加上一位ＩＴ專家幫忙，力求萬無一失。其實秘書處擔心嘅仲有搬遷議員辦公室問題，事關要搬六十個議員辦事處，一旦整唔見議員嘅嘢，分分鐘被問責，真係如履薄冰。秘書處仲決定搬屋之後電腦停用兩周，即係兩星期休業唔開會，畀時間啲軟件同硬件歸位，確保萬無一失。

九月，立法會仲係放緊暑假，所以「休業」嘅問題唔大，踏入十月，歷史揭開新一頁，新嘅一個立法年度喺新大樓「開學」，施政報告明年起喺新大樓宣讀，明年底政府總部搬埋去添馬艦，搬定屋之後大家一齊迎接二○一二年嘅兩個選舉。

立法會搬咗新屋一闊三大，最唔夠嘅要數保安員，保安員數目將由三十加到九十，一直懸空嘅總保安主任已敲定人選，呢位警司級人物今年十二月就會返工。此外，現時兩位分管財務委員會、內務委員會及十八個事務委員會等嘅助理秘書長，每人轄下都有六個小組、各小組有四點五人，將來要加到每人七個小組先掂，變相要請多九個人。

其實新大樓唔只地方大咗，議員數目亦由六十加到七十，沒完沒了嘅辯論會更加「發水」。Pauline話下屆立法會增加議席後，維持立法會大會得六條口頭質詢及兩個動議辯論的話，每位議員提問同發言嘅機會會減少，點樣配合呢啲變動，一切都要從長計議。