中環耳目：蘇永強最愛鏞記燒鵝
以燒鵝聞名嘅鏞記，捧場客多不勝數。幾乎晚晚食應酬飯嘅香港錶廠商會會長蘇永強（Paul），笑言自己大鑊飯食得多，對香港食肆冇咩特別心水，但逢親錶廠商會開例會食飯，就會選擇鏞記，佢自己都幫襯咗佢幾十年。
皮脆肉香 鮮甜多汁
Paul公務繁忙，唔講唔知，原來佢晚晚喺外面應酬，扣除大節日之後，一年之中返屋企食飯唔多過十日，認真辛苦！難怪卓妮問佢推介心水食肆，佢諗極都諗唔到，因為佢食飯時專心傾偈多過品嘗美食嘛！不過，如果由佢話事去揀食肆，佢就鍾意幫襯鏞記嘞，必食之選梗係唔少得金牌燒鵝喇。
鏞記燒鵝有好多花名，包括飛天鵝、飛機鵝或者飛機燒鵝，感覺好威風，事關唔少外國遊客同埋城中名人食過翻尋味，訂購鏞記燒鵝拎上機以饗親友。鏞記係用獨家配方燒製，皮脆肉香，鮮甜多汁，難怪即使歷經半世紀，依然有咁多粉絲。