中環出更：紡織女王撐本地時裝設計
有「紡織女王」之稱嘅行政會議成員楊敏德（Marjorie）早前獲選為十大最佳衣着人士，仲去咗上海領獎。尋日佢着住件大花連身裙出席行政會議，似係法國名牌LEONARD嘅手筆。
Marjorie同卓妮講，以前經常幫襯著名形象指導劉培基，但現在反而搵設計師鄭兆良比較多，希望盡力支持吓本地設計師。不過，Marjorie有少少尷尬話：「今日我件衫唔係本地設計師出品，但應承你下次一定着番本地貨！」
不過，外國設計深受全世界歡迎必然有佢嘅過人之處，就好似LEONARD時裝，以濃烈黑、鮮紅及綠色等拼湊出賞心悅目嘅印花圖案，質料飄逸舒服唔易皺，連健康快車創會主席方黃吉雯都係擁躉之一。LEONARD一條連身裙閒閒哋售五位數字，但剪裁好好，乜都抵番啦！