中環出更：授勳臨時取消戴德豐失預算
今年授勳原定喺上周末舉行，點知港府被「雷聲大、雨點小」嘅颱風鮎魚嚇窒，臨時取消喺禮賓府舉行嘅授勳儀式，要重新安排授勳之餘，仲打亂晒受勳人士嘅預算。香港潮州商會尋晚設宴為十六位獲授勳及委任為太平紳士等榮譽嘅潮州人慶祝，揀得尋日慶祝就當然諗住戴起勳章威威啦，點知港府一聲取消授勳，所以個個胸口只能改戴襟花。
榮獲金紫荊星章嘅全國政協常委、「零食大王」戴德豐對取消授勳都有啲微言，佢話早前接獲通知，原定喺上周末隨廣東省政協訪問團到湖北考察，但撞正授勳儀式咁大件事，當然去領取金紫荊星章緊要啲啦，點知港府臨時取消儀式，考察又無得去，即時兩頭唔到岸。戴德豐無奈話，事前諗住帶太太同兒子去觀禮，又通知晒所有親戚朋友，真係失晒預算。
黑英暗寸港府驚青？
今次鮎魚襲港，究竟係天文台預測唔準吖，抑或港府驚青過敏呢？卓妮尋晚遇到身為潮州「架己冷」嘅前天文台長林超英，潮商慶祝佢獲港大頒授名譽大學院士。林超英力撐天文台預測颱風鮎魚移動途徑好準確，佢話：「天文台一早就講咗個風吹去邊啦！」咁係咪暗示只係港府驚青取消授勳儀式呢？佢就耍手擰頭話唔講現在嘅嘢，反而鍾意講一萬年前嘅嘢喎！
卓妮同場仲見到「亞視義工」王征及亞視執行董事盛品儒嚟湊熱鬧，問王征會否應徵做亞視行政總裁（CEO），佢話CEO胡競英只係暫時停職，如果呢個位真係公開招聘，佢一定會應徵喎！不過，盛品儒就話暫時無意招聘CEO，目前由佢負責營運管理，至今無論士氣及營運等各方面都比以前好好多喎！睇嚟王征都係要繼續做住義工先喇！
卓妮