垃圾站夜後變車場

家住西貢的林先生不時途經宜春街垃圾收集站，近日不時發現，垃圾站內長期停泊的並非垃圾車，而是與垃圾無關的私家車，「如果撞啱星期六、日下晝，仲會有私家車喺度洗車，睇真啲洗車嘅（人）居然係對面街市檔主，仲開大個水喉，用埋公家清潔劑添！」

事實上，食環署職員除將垃圾站變身「洗車屋」外，林又發現，入夜後的垃圾站會向附近食肆的食客提供代客泊車服務，「夜晚入西貢食飯好難搵位泊車，估唔到政府都諗唔到嘅賺錢橋竟然畀佢哋（食環署職員）諗到，垃圾站變停車場，真係好絕！」林更曾多次目睹食環署職員將大型垃圾桶當作車輛屏障，企圖遮掩途人視線，懷疑食環署職員私下收受利益。

垃圾站變身停車場或可為政府開拓另類「財路」。

垃圾站違規變停車場，同屬公物的垃圾桶亦遭人用作「霸車位」工具。

署方疑包庇稱查無所獲

「嗰度又唔係政府停車場，垃圾站只可以收集垃圾，點可以畀人泊車，仲做埋洗車屋，有冇搞錯？」立法會食物安全及環境衞生委員會委員王國興指摘食環署未有執行管理責任，倘證實有食環署職員公器私用，將對公務員形象造成嚴重影響，「用公家地方做私人嘢，話冇利益問題都好難令人相信，點同公眾交代？」

西貢區議會地區設施管理委員會副主席吳雪山亦狠批食環署監管不力，職員亦有嚴重失職之嫌，直指「食環署冇咩理由可以縱容呢啲事發生」。吳又指上址為大型垃圾收集站，屬於政府物業，即使站內空間充足，亦不代表可進行「另類工作」，要求食環署立即徹查事件，以正視聽。

然而，即使面對嚴重指控，食環署發言人竟稱，經多次派員突擊巡查，均未有發現有關違規情況。發言人又重申，除該署車輛或因工事而獲准停泊的車輛外，其他車輛均不可停泊在垃圾站或於站內進行洗車活動，一旦發現有非食環署或未獲准許車輛停泊在垃圾站，職員會警告有關人士並要求駛走該車輛，否則會通知警方跟進。

ireport_00024191

記者　梁少儀