高官與青年學子談安居置業，又係「三粒米，一鍋粥」的話題。「三粒米」能煮成一碗儼然的「粥」，這是個混亂、虛假社會的現象。
大學生說買唔到樓女友唔嫁他，這是內地拜金女的變奏：「寧做二奶，不嫁窮漢。」而高官答得一樣空洞無一物兼遠離實際生活：「如果一定要買樓先結婚，會少咗好多選擇，多咗好多摩擦。」高官不如咁講：買樓不是有錢人的專利，有多少錢就能炒邊區的樓，同樣快樂；我居公屋或住陋室，貼張豪宅廣告在床頭，與愛人用眼睛欣賞全城燈火，好幸福。
有個笑話：兩隻青蛙相愛，婚後生一癩蛤蟆，公青蛙大怒：怎麼回事？母青蛙哭着說：他爹，認識你之前我整過容——了解很重要。
是的，了解很重要。老朽可以話畀一心想置業的大學生知，即使你畢業後毋須還貸款，月入兩萬元（機會好微），唔使養父母，如果樓價仲係咁升，而政府依然「華而不實」地吹水「置安心」，老朽勸你拋掉幻想，深呼吸氣沉丹田，笑着做「剩男」吧！生不逢辰，非戰之罪也。
事實上，香港的房地產正呈現並承受着泡沫經濟的高度風險，呎價不但逼近九七年，並有過之而無不及；而且「地王」頻現，上水、元朗亦多見豪宅。政府叫青年人置業，起初唔好專吼市區，多向「偏遠」地區埋手，然而，建在堆填區都係豪宅，睇怕初出道的專業人士都上唔到車，剛畢業的大學生，為安全計，一於做寄居宅男，在家靠父母。
老朽一屋剩女、剩男，有苦向誰呻？格林斯潘話：泡沫只有破了才能證明是泡沫，未破前，舞照跳吧！