政情：橄欖爭位又輸在人緣
立法會審議競爭法嘅法案委員會正副主席之爭，尋日出現意外結果。民建聯陳鑑林（橄欖）同泛民主派爭奪副主席時，喺票數上打成平手，惹嚟建制派倒戈嘅謎團，最後橄欖輸埋抽籤，重演○六年佢同泛民爭奪財務委員會主席時嘅滑鐵盧一幕。
法案委員會有四十位議員，當中十五個係泛民，不過尋日會上建制同泛民陣營各有兩人缺席。結果經濟動力梁君彥以廿一票力壓十五票嘅泛民輕鬆跑出，但好明顯建制派有兩票過咗檔，而橄欖同泛民爭做副主席就各得十八票，換言之有五票倒戈。
其實橄欖出名多仇家，綜合各方消息，專業會議、五散人、潮州怒漢詹培忠、旅遊界議員謝偉俊，以及同橄欖有牙齒印已屬公開秘密嘅工聯會都有倒戈嘅嫌疑。工聯會議員黃國健誓神劈願話，工聯會同民建聯分屬兄弟，佢哋又同橄欖係老友，從來都互相支持，倒戈者一定唔係佢哋。
有建制派中人同我哋講，有人唔認同正、副主席都由建制派包攬，所以咪倒戈囉！