政情：陳智思無興趣選特首
立法會建築、測量及都市規劃界議員劉秀成公開撐前泛聯盟「盟友」陳智思（Bernard）選特首，大讚做過立法會保險界代表嘅Bernard年輕、有幹勁同叻仔。不過，Bernard尋日表明，無意玩特首跑馬仔遊戲，令劉秀成「造王」不成。
「係咪整蠱我？」
有「公職王」外號嘅Bernard，尋日以主席身份主持完可持續發展委員會會議後，被記者問及有無意思選特首，佢笑指，可能因為佢夠年輕，過往的確係有人講笑話要提名佢選特首，但佢「絕對無打算」跑馬仔，一嚟無興趣，二嚟公職纏身，疲於奔命：「唔好話做特首，局長都唔想做。」
曾經想提名Bernard選特首嘅人，會唔會就係劉秀成呢？唔似，事關Bernard尋日聽見話劉秀成撐佢時，一臉狐疑，笑言「係咪整蠱我㗎？」然後就話好多謝賞識佢嘅人喎。其實劉秀成曾經同Bernard一齊喺立法會合作，又點會係整蠱佢呢？賞識佢就真。