政情：阿Ron以理服人對抗種族歧視
被喻為五百年一遇嘅強颱風鮎魚來勢洶洶但最終打唔成，搞到本年度嘅勳銜頒授典禮被迫改期。獲頒大紫荊勳章嘅香港交易所主席兼行政會議成員夏佳理（Ron）尋日就話，上周六本來打算同太太及兩個囝囝去禮賓府見證佢光榮一刻，依家典禮改期，點都有啲失望，事關專程返港觀禮嘅大仔，改期後未必可以出席。
曾與非洲同學上街示威
Ron係印度同中國混血兒，有攞大紫荊嘅成就相信比純正中國人付出更多努力。Ron尋日同班年輕人分享時，就直言佢媽媽喺佢細個時，已經教導佢唔好以「我係混血兒」作任何事嘅擋箭牌，仲話如果有人歧視佢，佢應該以理服人。
佢又憶述自己留英讀書時，同一班非洲同學仔「溝埋一齊」，仲試過一齊上街，爭取種族平等。
喺Ron擔任過咁多公職，佢話做馬會主席好有意義，佢記得喺○三年沙士之後，馬會捐出五億元成立疾病預防及控制中心，成為咗今日嘅衞生防護中心前身。