政情：We Wet強失勢焗裸退

鄉委會過去一直由挺強派嘅「黑衫軍」及倒強派嘅「黃衫軍」兩股勢力角力，自We Wet強本年初捲入區議會辦事處租金津貼風波後，黃衫軍倒強聲音更加熾熱，誓要拉We Wet強落台。據聞We Wet強為咗自救，瞓身拉票，前日仲帶埋阿媽返坪洲投票救亡，可惜為時已晚，十七個街坊代表之中，只贏得兩個席位，當日下晝佢見大勢已去都提早鬆人。

連帶失區會議席

有知情人士透露，○八年底坪洲興建發射站風波發生時，鄉議局主席劉皇發已暗示We Wet強下屆好難再做鄉議局副主席，但坪洲鄉委會主席個位，就要睇We Wet強自己造化，但勢估唔到前日選舉輸得咁慘烈。

坪洲鄉委會由十七個街坊代表、三個村代表及一個太平紳士組成廿一人互選出正、副主席，其中嘅太平紳士就係林偉強。選完街坊代表之後，We Wet強只得三票，就算明年一月選出嘅三個村代表都撐佢，一共只得六票亦難以連任鄉委會主席，佢繼而唔能夠以當然議員身份進身離島區議會，即係話佢連離島區議會主席個位都冇埋，牽一髮動全身。

離島區議會主席個位邊個補上，好多人話現任副主席周轉香（香姐）最有機會，但之前有傳話鄉議局主席劉皇發想捧自己個女婿、離島委任區議員余漢坤上位。不過，余漢坤早前已表明無意爭做主席，話即使有人事變動，都會推舉香姐接手喎。最終由香姐同余漢坤分別擔任正、副主席，可能就係最「和諧」嘅局面嘞。