中環出更：陳晴佗B萬聖節唔扮嘢
近年海洋公園搞萬聖節活動愈玩愈癲，唔止主席盛智文例牌領銜扮嘢，連斯文淡定嘅海洋公園保育基金主席陳晴（Judy）都玩埋一份，但今年佢決定唔扮嘢。點解？Judy笑稱，佗住咁大個肚，無論點化裝人哋都認得佢啦！
呻會畀人認出
前日聯合國兒童基金邀請一班小朋友參加萬聖節扮嘢比賽，Judy啱啱升任兒童基金香港委員會主席，當日梗要現身撐場，又做埋評判。面對嘩鬼空群而出，Judy即使佗住BB都百無禁忌，仲讚小朋友無論點扮都好可愛，認真愛心爆棚。
Judy又話，今年佢唔會扮嘢過萬聖節，咪以為佢大肚多多避忌，其實係因為身形太明顯，無論點化裝扮嘢都會畀人認出，所以咪費事玩囉！講番就嚟做媽咪嘅心境，Judy話預產期喺年底，暫時未諗到幫小生命改咩名，仲話諗到時會通知我哋喎！