中環出更：李妮難抵BVLGARI鑽錶誘惑
靚女戴靚錶零舍令人賞心悅目。早前卓妮喺博愛醫院嘅活動上見到前亞姐冠軍、博愛醫院總理李妮（Lily），佢戴咗隻鑲滿閃鑽、售價十三萬幾嘅BVLGARI腕錶，別致高雅。咪以為靚女使錢唔眨眼，原來佢扑錘買隻錶之前，足足諗咗成個星期。
諗足七日七夜
Lily依家係幸福少奶奶，自己又有投資其他生意，間中買靚錶、靚衫獎勵自己自然不過。當日卓妮見佢手挽Hermes青綠色靚袋，佢笑稱係「鴨屎綠」，但卓妮見佢演繹咁蝦人穿戴嘅顏色，又carry得好好喎！
講起隻BVLGARI靚錶，原來有段古。Lily話，有日佢陪朋友去BVLGARI分店攞錶，閒逛時被呢隻鑽錶深深吸引，但定價要十三萬八千元，於是佢話畀自己聽，如果喺未來三日都掛住佢就買啦！卒之佢諗足七日七夜，隻錶注定屬於佢。Lily話，佢嘅消費態度一向好認真，尤其是參與慈善活動後，更加珍惜自己擁有嘅一切。