東區醫院揭發一宗駭人聽聞嘅風化案，一名五歲女病童懷疑被留醫嘅十三歲外籍男童強姦。警方初步懷疑，有人趁醫護人員人手緊張睇漏眼，潛近受害女童病床犯案，簡直係色膽包天！
公立醫院愈來愈離譜，病房如同冇掩雞籠，病人安全毫無保障，豈有此理。其實今次事件完全可以避免，有員工事發前見到一名男童喺病房內自瀆，擔心影響其他女病童，於是向院方上報，點知院方居然無動於衷，並冇作出任何安排。唉，病人面對威脅，醫院闊佬懶理，唔出事至奇！
風化案時有發生，但受害人居然係五歲女童，而且發生喺醫院病房，真係聞所未聞。香港自稱「國際大都會」，攞得出嚟見人嘅成就欠奉，唯獨騎呢古怪嘅丟架醜聞就一單接一單，唔通真係撞邪？
話時話，香港確實夠晒邪。五歲女童喺公立醫院受到性侵犯，講都冇人信；仲有吖，前年有位少女去警署報案，居然被警員強姦，真係幾邪都有。
唔知係咪邪開有條路，連作育英才嘅教師都邪埋一份，近年校園風化案愈來愈多，愈來愈得人驚。有人同未成年少女去時鐘酒店開房；有人喺山邊同女學生玩「車震」；更有教師以影模相做藉口，引誘女同學影裸照，真係要幾賤有幾賤。
講開公立醫院，真係愈講愈火滾，近年醫療事故無日無之，仲恐怖過閻王殿。一時打錯針，一時開錯刀，一時輸錯血，一時割錯器官，一時遺失嬰屍。而做完手術後喺病人體內留低「紀念品」，更加係家常便飯，紗布、膠喉、醫療儀器……千奇百怪，五花八門，問你驚未？
就算執番身彩完完整整喺手術室行出嚟，亦未必擔保冇事。呢，上次瑪嘉烈醫院發生淥Ｂ事件，幾個月大嘅男嬰被滾水淥到下身通紅甩皮；事隔冇幾耐，今次又輪到東區醫院發生女病童被性侵犯。
公立醫院衰完一鑊又一鑊，食物及衞生局局長周一嶽身為問責高官，唔畀心機改善管理，提高服務質素，反而搏晒命去推銷嗰個以民為笨、旨在推卸醫療責任嘅所謂自願醫療保險計劃，真係九唔搭八。家陣連一個五歲女病童都保護唔到，仲講乜鬼醫療保險吖？收皮罷啦！
國之將亡，必有妖孽。人行衰運頭頭碰着黑，香港行衰運除咗淋鏹水、冧招牌、冧樓、冧樹呢啲天災人禍停不了之外，仲有色狼肆虐病房、差人作姦犯科、教師以淫為本呢啲匪夷所思嘅天下奇聞，香港邪成咁，唔通真係氣數已盡？