政情：久旱逢甘露李國棟拉頭馬

李醫生話好耐無拉過頭馬，所以都有啲唔習慣；佢仲幽自己一默話因為做大董，平時喺頒獎台都係做布景板，今次到自己拉，都唔記得咗要點企。不過「活力奔騰」跑完千八米返嚟依然活力十足，仲非常奔騰，埋位影咗無耐，就跳跳紮紮，大家惟有順佢意，影咗幾張就唔使佢再上鏡，難得李醫生唔介意，繼續開開心心同班老友影相留念。咁又係，來日方長，今次李醫生熟習咗個企位，下次再拉就有晒經驗啦！

陳健波有斬獲笑逐顏開

至於老友前醫學會會長謝鴻興醫生就買咗一百蚊支持，謝醫生話以前都好鍾意買馬，不過每次都係小額投注，志在考考眼光，雖則次次都有斬獲，不過佢好坦白咁話，如果靠買馬仔嚟開飯就唔得掂，都係做番醫生最好喎。立法會議員陳健波尋日現身馬場，同樣有斬獲，佢同太太喺廂房攞住張飛笑口盈盈，唔通贏好多？陳議員事後話只係贏咗少少，但同太太都唔識賭馬，入嚟只係諗住鋪吓草皮；依家買中咗，唔開心就奇啦！