政情：姚君達入馬場補祝愛女生日
米蘭站主席兼行政總裁姚君達（Byron）嘅二手名牌手袋生意愈搞愈大，十幾間分店遍布港澳及北京，其中位於北京朝陽區三里屯及華貿中心商業街嘅兩間分店新開無耐，Byron要經常北上坐鎮，忙到無時停，不但暑假無去旅行，甚至忙到無時間同愛女Jaster補祝十五歲生日。
韋國洪：《東方》馬經準夾堅
不過，Byron並無忘記愛女生日，尋日孖住太太同十三歲兒子Jaliff及愛女入沙田馬場食自助餐補祝生日，一家四口樂也融融。原來Byron係馬會會員，但一直無養馬，去年先至以二百萬元購入一匹英國馬，希望過吓馬主癮，佢隻愛駒經過嚴密訓練後，可望明年正式出賽。
尋日見到Byron一家外，仲見到全國政協常委陳永棋及沙田區議會主席韋國洪，棋哥入場主要係為愛駒「精密紡」出賽打氣，可惜最終三甲不入，無功而還。至於韋國洪就入場湊熱鬧，佢手執一份《東方日報》馬經，仲話係《東方》嘅長期讀者，大讚本報馬經數據準，貼士堅！