政情：陳維安有運跟住好老細

最怕遇着攬權卸膊型

打工仔「發圍」定「發毛」，除咗視乎老細睇唔睇你，有時都要睇個上司捨唔捨得放權，放手畀機會你玩，抑或一味縮骨卸膊、搵下屬擋箭。有副局私下呻，十八個同僚之中，食物及衞生局副局梁卓偉同教育局副局陳維安彈出，除咗個人因素，更大原因係入局時抽到支好籤，事關佢哋兩個直屬老細，即係局長「周一鑊」周一嶽同「孫公」孫明揚，都係出名將職務放手畀下屬做嘅人，你話係懶又好，肯放權又好，總之比起其他副局，梁卓偉同陳維安特別多發揮機會。而「周一鑊」直情係「隱形」嗰隻，菲律賓慘劇發生後，佢繼續施施然放假去，留番梁卓偉做善後醫療工作，轉頭又話放假，今次都放番十日以上，成日唔見影，真係有冇佢喺度都無乜所謂。

不過，大家咪睇孫公成個官場老油條咁款，有政界人士話，其實佢唔止係好老細，仲十足一個「湊仔公」，交畀副局陳維安同政助楊哲安接手嘅事務，都係輕鬆嘢，永無政治炸彈，好似推銷課本電子化咁，唔會引發大爭議；但面對棘手項目，好似早前嘅「三三四」新學制同殺校，孫公就自己孭上身，相當有承擔。有咁嘅老闆湊住，做得唔好都對唔住個天啦。

所謂「同人唔同命」，同樣係副局政助，跟住唔同局長，政途有好大差別。據聞，邱騰華就屬於「攬權型」嗰類，自己能力有限，好似慳電膽、停車熄匙呢啲政策都搞到一鑊粥，但卻唔肯放手畀下屬做，所以佢個副局潘潔上任兩年，都未試過有重頭項目過手，更遑論表現機會。聽講有人仲喜歡以e-mail向局方傳達訊息，公務員收到，但自己個副局竟然收唔到，呢位副局嘅處境，大家可想而知。

另一位難做嘅副局係民政事務局副局許曉暉，事關德成局長可以話係「卸膊型」嗰隻，工夫自然留番許曉暉嚟做。好似出席立法會受靶，就由許曉暉去頂；嘻嘻哈哈嘅社團酒會，德成局長自己御駕親征。同議員聯絡，德成局長專揀同建制派自己友打關係；同反對派泛民溝通，又留番畀許曉暉。許曉暉真係要多謝呢位老闆至得囉！