中環出更：金刀梁夫婦最愛COVA歎意粉
兩夫婦飲食最緊要夾，揀餐廳食飯都容易啲。好似行政會議成員梁智鴻（金刀梁）同太太馮令儀兩公婆，就不約而同迷上意大利粉，金刀梁鍾意Carbonara（淡忌廉雞蛋煙肉白汁意粉），梁太最愛龍蝦闊條麵（Fettuccine Lobster），佢哋最鍾意幫襯金鐘太古廣場三樓間COVA Ristorante & Caffe餐廳，大讚COVA食物夠水準，又好招呼。
順道探相熟侍應
卓妮有日遇到金刀梁夫婦去COVA開餐，佢哋依舊柯打番自己最愛嘅Carbonara及龍蝦闊條麵，食到津津有味。雖然COVA嘅龍蝦闊條麵做得好出色，但梁太嘅印象中，最出色嘅，反而係英國倫敦Bayswater間Mandarin Kitchen（喜雙逢）嘅龍蝦麵，龍蝦夠新鮮，醬汁又好味，令佢回味無窮。Mandarin Kitchen喺當地頗有名氣，除咗龍蝦麵外，烤鴨做得同樣出色，筷子同刀叉混用，係間中西合璧嘅餐廳。
話說回頭，梁太話去幫襯COVA要加埋感情分，事關佢哋幫襯咗好耐，同啲侍應好熟落。其中一個侍應阿Ann，原來以前喺瑪麗醫院餐廳做過，招呼過當時擔任瑪麗醫院放射科主管嘅梁太，兩人相識已久，所以梁太去COVA有雙重意義，食好嘢之餘，仲幫阿Ann打打氣。
其實當日金刀梁夫婦放假去太古廣場行街，先到電腦舖買iPad保護套。原來早前愛女送咗一部iPad畀金刀梁，方便佢睇文件，有個孝順女真係幸福。買完iPad套，佢哋本來打算去睇戲，點知齣戲爆到得番一個位，結果睇唔成，改去COVA開餐。梁太呻話，近兩年只係一味出席活動首映禮，私下就無去拍拖睇戲喎。金刀梁快快冧番太座：「大家都咁忙，無辦法啦！」