中學收生不足面臨殺校潮，教育局局長孫明揚公布暫緩殺校一年，惟繼續推行自願縮班計劃，暗示將迫使轄下開足五班中一的官立中學率先減班，料全港將有十一間深受家長歡迎的傳統英文官中如皇仁、英皇書院等瀕臨為「減班試驗品」，約有四百個學額會消失。
當局此舉，明顯有違市場自由競爭原則，違反優勝劣敗規律，試問家長心儀的名校，如今無端大減學額而要無奈另擇他校，家長怎會高興？道理就如一間好的食肆，有五間分店，食客盈門，現在因為它太好生意，政府話咁唔得喎，人哋拍烏蠅，你就做唔切，今勒令你關一間食店，等啲客流去冇生意的食肆，你話咁通唔通？
食客盈門，皆因口碑好，啲人苦候都要等，反之，立刻有位的烏蠅店，你請我都唔想入去坐，我情願回家食杯麵！
好學校或者名校多人爭讀，政府如帶頭縮班，無疑製造恐慌。事實上，在家長群起反對下，且各官校的學校管理委員會也未必能通過。當局為了拖延殺校，使出呢招縮班計可謂「屎橋」。有啲嘢其實不必矯情，好似「求學不是求分數」，那求甚麼？不求分數入得名校嗎？而讀書，除了求知求樂趣，讀書也是為改善生活啊！
有學者明言，通過努力學習來得到成功的話，這個社會該多麼有力量，多麼蓬勃向上；向高分看齊有甚麼錯？在分數面前基本是平等的，通過分數，排除掉人情和權力，這有何不好？如今，學校辦得好，家長爭學位已爭崩頭，教育局竟然要名校揮刀自宮，有理嗎？