政情：黃進達：遊台韓勁旺
香港人愛旅遊，只要有假期，就算得三兩日都會出門，今個中秋雖然無連住星期六同星期日，不過趁住秋高氣爽，出門嘅人亦唔少。康泰旅行社董事總經理黃進達（Jason）話，今年台灣同韓國嘅團生意最好，反而向來係港人至愛嘅日本，銷情就一般嘞，事關依家日圓高企，所以少咗人去。唔知同近日發生嘅釣魚島事件又有冇關係呢？
投資外幣要睇眼光，如果一早儲落日圓嘅話，依家就賺到笑嘞。Jason話佢公司一直都有儲外幣嘅措施，除咗日圓，其他貨幣佢哋都有唔少存貨。做旅行社當然要有外幣儲備，用嚟抵銷幣值波動帶嚟嘅衝擊喇。不過Jason話自己就無入定日圓，依家專心做好呢份工，短期內亦唔會出門。
Jason前日喺一個潮屬社團嘅活動現身，佢本身係潮州人，但佢話喺屋企都係講廣東話，不過自從加入咗社團之後，同班世叔伯溝通得多咗，自己嘅潮州話都進步咗唔少。