政情：副局政助變五毛黨？
政府成日話要善用資訊科技同互聯網，加強同年輕一代嘅交流同溝通。一直只聞樓梯響嘅特首辦facebook網頁《上亞厘畢道》尋日終於開張。呢個網頁可以話麻煩多多，先有政府特意為個網站招聘項目主任畀人質疑嘥公帑，再有開張日期因突然發生菲律賓人質慘劇一拖再拖，由原本上月底出街，押後到尋日至同市民見面。
細心睇睇《上亞厘畢道》個網頁，發現留言同支持嘅人之中，竟然包括特首辦主任譚志源、民政事務局副局長許曉暉、財政司司長政治助理葉根銓、民政事務局局長政治助理徐英偉、勞工及福利局局長政治助理莫宜端同油尖旺民政事務專員郭黃穎琦等等。至於商務及經濟發展局副局長蘇錦樑更加喺自己facebook轉載呢個網頁嘅資料添。
齊心撐老闆本來無可厚非，之前曾經有傳聞話內地有「五毛黨」，每發一個歌頌政府嘅留言，就可以得到五毫子；呢班副局政助個個月薪都十萬蚊計，唔通港府一早就想用高薪吸納呢啲「優才」？