政情：爭超級區會建制派砌唔掂

棠哥前日特登邀約傳媒聚會，自爆唔排除親自披甲出戰「超級區會」。不過，無論係建制派定係泛民主派，都對棠哥最終會否出戰有好大保留，一來佢已經退出議會十幾年（佢喺回歸前做過立法局議員），依家貴為行政會議成員，好難想像佢仲會有心機同時間做立法會同區議會工作。

協調部署 各有難處

再者，為免太早畀對手睇通條路，各黨派一般都會留到最後一刻，至公布自己嘅真正選舉部署。棠哥咁高調事先張揚參選大計，難免令人懷疑佢係「靠嚇」居多，目的係為將來嘅建制派選舉協調增加談判籌碼，情況同早前匯賢智庫葉劉淑儀聲言會力爭薄扶林區議會議席、以及自由黨可能留番山頂區議會個位畀前主席田北俊出選一樣。

有建制派人士分析，「超級區會」只有五個議席，建制派估計只能坐二望三，因此有機會參戰嘅四大建制派政團民建聯、工聯會、自由黨同匯賢智庫，必須作出協調及視乎其他三個政團嘅部署，嚟決定自己嘅人選。偏偏「超級區會」嘅參選人必須為現任民選區議員，四個政團當中，田少同葉太都未必可以喺單議席單票制嘅區會選舉中穩勝，佢哋能否攞到入場券參選「超級區會」，要等到明年底先至知道，令大家唔知點樣部署好。

至於擁有大量穩陣區會選區嘅工聯會同民建聯，其實亦各有難處。剔除猶抱琵琶半遮臉嘅陳婉嫻，工聯會內擁有全港知名度嘅，就得番棠哥同王國興，但如果興哥轉戰「超級區會」，該會隨時又會輸番新界西嘅直選議席。民建聯雖然擁有最多立法會同區議會議員，但同時擁有兩種身份嘅，原來只得葉國謙、黃容根、張學明同李慧琼四人，其中張學明仲係委任區議員，唔符合參選資格，其餘三人亦各有不足，改派第二梯隊出戰又風險過高，總之就係諗爆頭，隨時要磨多一年半載後，形勢先會比較明朗。