中環耳目：吳文華貪新鮮歎台式便當
立法會秘書長吳文華（Pauline）係工作狂，忙起上嚟，佢日日食三文治都得，不過佢都好鍾意新鮮感，一有時間就捐窿捐罅試新餐廳。趁立法會放暑假，嗰日Pauline去咗中環史丹利街一間叫「Night Market」嘅樓上餐廳試新嘢，一如其名，「Night Market」主打台灣夜市種種地道菜色，不過餐廳裝潢就相當摩登，幾有fusion味道。
「Night Market」午市打正旗號賣台式便當，每份便當都有燥肉飯同三款伴菜，連食具都特別過人。食客可以自行選擇滷雞腿、香酥豬排同宮保蝦球等九款主菜，加多杯珍珠奶茶就啱啱好嘞。其中佢哋嘅宮保蝦球更係水準之作，蝦球爽口得嚟又有鮮味，絕對值得一試，其他菜式亦係好睇又好食。雖然Night Market主打夜市食品，但價錢就一啲都唔夜市，不過喺中環可以百零蚊埋到單，算係咁啦。
