民以食為天，官以民為笨。估唔到本港食物安全監管咁兒戲，一項普通食物檢測居然要拖個幾月先至有結果，簡直豈有此理！
八千隻內地入口嘅冰鮮雞，被食環署驗出含殘餘獸藥，呢種獸藥係孕婦及兒童忌用嘅抗生素，萬一孕婦食咗未煮熟嘅含藥雞隻，胎兒骨骼發育可能受影響，絕對唔講得笑。
含獸藥冰鮮雞流入本港唔出奇，最奇嘅係食環署做嘢歎慢板，而且慢到你唔信。原來呢批雞七月二十二日喺文錦渡抽樣，但居然要等到今個月六日至有檢測結果，事隔四十幾日，乜都食晒落肚啦。有關注團體直指食環署化驗速度難以接受，絕對有問題，假如雞隻含可引發急性病症嘅毒素，後果不堪設想。
同龜速化驗一樣惡頂嘅，仲有食衞局局長周一嶽卸膊嘅醜態。佢尋日仲死撐，話已追查到「毒雞」來源，同一來源其後幾批輸港冰鮮雞都冇問題，仲強調當局冇收到任何市民進食之後感到不適嘅報告，呢個超標水平對健康冇任何大影響喎。
周一鑊噏嚟噏去，始終迴避問題嘅核心：點解化驗結果要四十幾日至出嚟？遲嚟嘅結果對保障食物安全毫無意義，咁仲化驗嚟做乜？官僚卸膊，愈描愈黑，簡直九唔搭八！
按周一鑊嘅講法，冇市民報告食獸藥毒雞之後感到不適，即係可繼續食用，呢啲係乜嘢邏輯嚟㗎？正如專家話齋，呢種抗生素唔係好似沙門氏菌咁，即時令人有不良反應，但危及孕婦，禍及胎兒，後果更嚴重。身為主管衞生事務嘅問責局長，周一鑊邏輯混亂，連基本常識亦欠奉，唉，靠呢個政府為食物安全把關，真係死得人多咯。
係人都知，內地係本港食品最主要來源地，但同時又係問題食品主要「毒源」。內地食品安全問題出晒名得人驚，香港已經多次中招，照計港府應該對呢類食品加強檢測，及時堵截問題產品至係正路㗎，弊在當局從來唔識吸取教訓，搞到多次爆出監管失職醜聞。
呢嗱，孔雀石綠魚、山埃蘇眉、蘇丹紅鹹蛋、哮喘藥豬肉、農藥毒菜，仲有三聚氰胺毒奶等等，統統喺本港出現過。呢次又因為檢測化驗慢到離晒譜，畀獸藥毒雞長驅直入。食品安全不設防，市民唔驚就假。
仲有呀，受獸藥毒雞影響最大嘅係胎兒，周一鑊居然話呢次抗生素超標水平對健康冇乜大影響，完全不負責任。當年爆發三聚氰胺毒奶事件，內地當局最初亦係咁敷衍民眾，結果各地陸續出現「結石寶寶」，最終受影響嘅小朋友多達三十萬。唔通要等悲劇重演，周一鑊至知衰？
當年周一鑊誓神劈願話食咗含少量三聚氰胺嘅食物，對健康冇影響，但人哋叫佢食一粒熊仔餅咁大把，佢即刻耍手擰頭，幾乎落荒而逃。功夫茶好想知，如果今次叫周一鑊試食獸藥毒雞，佢又會有乜嘢反應呢？