政情：西九諮詢最怕三分天下

西九第二階段諮詢唔經唔覺過咗大半個月，有西九管理局高層話，公眾同傳媒嘅反應初步尚算正面，起碼冇人質疑任何一個設計「勁醜樣」、破壞環境、有抄襲成分等，以涉及咁多億元同各界高度關注嘅項目嚟講，已經值得佢哋開香檳慶祝喎。

無諗過要「三合一」

至於外界批評該局買斷三個設計同擔心變成「三不像」，該名高層就為管理局辯護，話其實該局一直諗住最後會揀定其中一個設計，從無諗過要「三合一」，但佢哋既然做得公眾諮詢，就無理由唔要求獲選嘅大師因應民意稍為修訂自己嘅設計，包括加入兩個落選設計嘅部分元素同優點。不過如此一來，該局又好容易畀另外兩位大師控告抄襲侵權，仲話屆時涉及嘅律師費同賠償，隨時唔止一點五億元喎，於是至一次過買斷三個設計嘅知識產權好過喎！

為咗喺個獲選嘅設計度加少少嘢同擔心畀人告，就白白花多成億元買埋兩個落選設計，睇怕納稅人都肯定唔會認同，審計署都好應該徹查一下至啱。不過局方依家最憂慮嘅唔係呢啲嘢，而係擔心市民對三個設計嘅支持度不相上下，令佢哋唔知點揀至好。

根據傳媒報道同個別非正式民調結果，三個設計真係各有捧場客。須知果敢決斷向來唔係管理局主席唐英年嘅優點，好似早前挑選西九行政總裁，據聞兩位最後入圍人選各取得三位遴選委員會成員支持，擁有最終決定權嘅唐唐就唔肯一錘定音，反而提議做多一輪面試，直至有候選人獲得大多數委員支持為止。

管理局將於諮詢期過咗一半後，率先審閱初步收到嘅市民問卷。有人提議若到時民意仍未有明顯取向，佢哋就要主動做啲嘢，例如要求三位大師提供呢三個設計嘅更多資料，甚至再次來港直接推銷，希望民意歸邊，否則到諮詢期結束仲係「三分天下」，唐唐可能又會要求西九諮詢委員會主席張仁良做多輪諮詢，令整個計劃再次被迫延遲都未定。