中環出更：胡曉明扮奄尖食客考員工EQ
曾經被譽為「電梯大王」嘅胡法光公子胡曉明（Herman），近年活躍中港政商及體育界，今年登上香港專業及資深行政人員協會會長寶座。胡家唔做電梯生意後，瓣數更多，包括地產、時裝、體育用品及酒店，但Herman更愛發掘美食，年前入股飲食王國。即係話，衣、食、住都網羅其中。Herman愛幫襯集團旗下食肆，笑言「錢要照畀，數目均真」，為提升服務質素，佢會扮成奄尖客人，考考員工EQ。
身為菱電發展有限公司主席嘅Herman，機緣巧合下，○七年起入股好友周驪莉（Anna）旗下飲食集團「景樂」（King Parrot Group）成為董事。「景樂」擁有三十六間食肆，由新疆、俄羅斯、泰國以至日本菜都有，較為人熟悉嘅包括「香辣屋」、西班牙餐廳「El Cid」、德國餐廳「King Ludwig Beerhall」等。
呢日Herman就相約太太梁子慧、大股東Anna及周氏家族另一位成員兼集團市場及業務發展部總監周基業（Keith），齊齊去灣仔合和中心地下嘅「King Ludwig」食德國菜。
研製黑椒啤酒醃豬肘
Herman對招牌菜瞭如指掌，一坐低就柯打一味「脆皮燒豬肘配酸椰菜」，胡太對海鮮有敏感，來一碟「德國腸拼盤」。
燒豬手係德國菜精粹，要整得好味相當考功夫。Herman唔識煮餸，但味覺敏銳，佢與Anna用心鑽研製法，最後敲定用黑椒、啤酒來醃豬肘最正，風乾後將佢放入燒爐烤四十分鐘，外皮卜卜脆如廣東式燒豬，肉質仍然juicy，嫩滑如雞肉，難怪日賣近一百六十隻，真係燒豬手都燒到手軟。
德國菜第二樣必吃之選，就係香腸。一客香腸拼盤有齊八款口味，包括慕尼黑幼牛仔肉、紐倫堡馬祖林粗豬肉腸、香草豬肉腸等。咪以為都係香腸一條，味道差不多，入口卻是風味各異，想吃濃郁一點，還是爽口一點，枱上款式咁多，總會找到你所愛。Herman笑言乜款式嘅香腸都鍾意食，最緊要係鮮味。
入股飲食集團後，Herman請客總愛到旗下食肆，感覺像回家般親切。不過佢都會微服出巡試菜，刻意挑剔菜式，問東問西。由於佢主力做「幕後」，甚少參與前線管理，夥計們都唔知眼前呢位「西裝友」，原來就係老闆。
卓妮