政情：胡氏父子同心申亞
自港協暨奧委會喺六月交咗申辦二○二三年亞運會嘅意向書之後，一直都冇聲冇氣。尋日特區政府宣布成立有成卅人嘅二○二三年亞運會臨時申辦委員會，除咗唔少係港協暨奧委會骨幹外，仲有來自商界以及不同團體嘅人。不過細閱名單就發現，胡法光同胡曉明兩父子竟然同時成為委員，都算係近年罕見。
臨時申亞委員會主席係民政事務局局長曾德成，身為港協暨奧委會會長嘅霍震霆做委員會副主席，而八位包括胡法光在內嘅港協暨奧委會副會長，仲有港協暨奧委會義務秘書長彭冲，亦同時成為臨時申亞委員會嘅委員。
胡法光嘅公子胡曉明雖然唔係港協暨奧委會骨幹，但就係大型體育活動事務委員會主席，照咁睇都係同申辦亞運有關，兩父子同樣響噹噹。不過父子同坐一個委員會嘅情況應該可免則免。唔知有三位公子嘅霍震霆有冇心癢癢，帶其中一個兒子入委員會呢？
聽聞委員會將於九月底至十一月頭諮詢公眾對申辦亞運嘅睇法，委員會三十幾人人多手腳亂，有部分委員話，仲未知到運作起嚟要點樣分工。