政情：南區跌棒 葉劉重傷
區議會南區薄扶林選區補選塵埃落定，公民黨司馬文攞六成選票，砌贏匯賢智庫葉劉淑儀徒弟劉應東。呢一役有形容為民主派同建制派明年區議會選舉嘅前哨戰，其實，話係葉太二○一二年立法會選舉轉戰區議會「超級議席」嘅試水溫之作更加貼切，事關葉太全程緊張拉票，猶如真正參選者。葉太今次南區地盤失陷，兼賠上議席同聲勢，可謂損兵折將，對爭逐「超級議席」，無論喺實際戰略同心理因素，肯定都會打折扣。
葉太失去薄扶林地盤，改寫該區二十年嚟由建制派主導嘅歷史，補選前晚結束，民主派同建制派唔敢怠慢，即刻派人進行選後數據分析，睇吓對明年區議會選舉有乜啟示，但兩邊陣營嘅初步分析，結論卻截然不同。
泛民建制各有分析結果
民主黨認為，選舉結果至少蘊含兩層重要意義。第一，劉應東得票七百九十二票，比同屬匯賢智庫嘅前任陳岳鵬○七年時跌票近兩成半，反映「葉太效應」已逐漸消退，無法延續○八年立法會選舉建制派「吸票機」嘅聲勢。第二，公民黨經歷「五區公投」後嘅低潮，之後支持度似有回穩迹象，某程度印證咗中大同港大最近民調情況。如果從呢兩點睇，一二年立法會嘅政治版圖或者有變。
不過，建制派就有唔同睇法。有民建聯高層叫大家睇番○八年立法會選舉嘅戰果，當時葉太喺薄扶林區嘅得票同劉應東相若，而當時公民黨同民主黨嘅總票數，正好又同司馬文得票差唔多，顯示前日補選只係○八年形勢嘅延續，加上劉應東空降參選同陳岳鵬中途離場嘅負面因素，選舉結果屬正常賽果，並不令人意外咁話。
到底建制派同民主派嘅分析，邊個客觀同準繩啲，一時間好難定奪，不過，幾乎可以肯定嘅係，對傳有意爭逐區議會超級議席嘅葉太嚟講，呢一仗絕對係一次挫敗。首先，從戰略層面，葉太要選超級議席，當選區議員後，仲要取得最少十張直選區議員提名票，薄扶林失守，令葉太手中穩取嘅提名票又少一張。其次，葉太在沒有政黨機器支持下，單打獨鬥出選全港性嘅超級議席，人氣同聲勢好重要，輸掉薄扶林老巢，聲勢受挫，對兩年後競逐更高難度嘅超級議席，心理必打折扣，直接左右葉太出戰嘅盤算。