好咯好咯，良心發現咯，一天光晒咯，鬼節快樂咯！
功夫茶到底噏乜鬼？邊有大吉利是話鬼節快樂㗎？本來係冇嘅，不過家陣有嘞。事關食環署終於知衰，決定放過上星期跪地求饒都冇辦法感動販管隊手下留情嘅婆婆，撤銷無牌擺賣嘅控罪。換言之，署長卓永興唔使受到良心譴責，可以安枕無憂過一個「心中無鬼」嘅盂蘭節。你話嘞，呢啲咪叫做鬼節快樂囉！
至於當日路見不平挺身而出怒呼「要拉拉我」嘅仗義阿伯，較早前亦撤銷控罪，野蠻執法者忽然變得有人性，冇堅持告佢普通傷人罪。
唔知係咪鬼節特別靈氣逼人，食環署撤銷控罪之餘仲鬼拍後尾枕，承認拘控婆婆過程未符合執法政策及指引，亦即係冇做到先警告後檢控。
嗱，咁咪好囉，做官唔應該咁不近人情，雖然你有權捉小販啫，之但係假如小販唔係阻街阻得好離譜，你咪放人哋一條生路囉。畢竟做得小販九成都係自力更生唔想靠綜援過活嘅草根階層，畀你捉去罰一鑊，唔知要捱幾多個好天曬落雨淋嘅苦日子先至賺得番咯。好似嗰個跪地婆婆咁吖，賣嘅係指甲鉗之類嘅小玩意，賺極都係十元八塊，萬一畀你罰款一千幾百，好傷㗎！
食環署亂咁拉小販都唔係第一次㗎喇，有時誇張到連領正牌照嘅小販都拉。好似嗰個「非法賣糖」嘅雪糕仔咁吖，連法官都睇唔過眼，先係質疑食環署太重手，然後輕判罰款百元了事，最頂癮嘅係法官喺庭上應承雪糕仔「以後幫襯你」，事隔冇耐真係坐言起行走去尖沙咀搵雪糕仔買咗一樽水。
開講都有話，法律不外乎人情，其實食環署只要吸取法官輕判雪糕仔嘅教訓，跪地婆婆成件事根本就唔會發生，仗義阿伯更加唔使擔驚受怕瀕臨冤獄邊緣。
咦，咪住先，卓永興唔使受到良心譴責啫，不過受到工會譴責喎。食環署職工權益工會副主席李美笑認為，署方話拘控行動未符指引係將責任推卸畀前線人員，又話指引對老弱傷殘定義不清，署方僅僅向中層人員派發指引，前線人員未必完全了解，卓永興夾硬要前線充當法官運用酌情權，出事就推卸責任，令前線士氣受挫，亦令執法模棱兩可。李美笑仲話：「見到小販個樣好老，但原來只得五十歲，咁拉唔拉先？」
唉，鬼節未算真快樂，署長工會鬼打鬼！
講真，功夫茶冇興趣研究卓永興同李美笑邊個唔啱邊個唔着，只要小販以後唔使遭受冷酷追擊就得嘞，尤其係七老八十嘅公公婆婆，好心唔好搞到佢哋滾水淥腳走鬼啦。基於呢個良好願望，功夫茶淨係想同卓署長講，麻煩你將指引派發到每一個販管隊人員手上，仲要下令個個讀到滾瓜爛熟，以後唔可以再野蠻執法，否則若然又惹起公憤，到時睇怕跪地求饒嗰個係你！
總之，食署尚未從良，知衰仍須努力！