政情：任亮憲揀區出選搔爆頭

任亮憲尋日直言，已經鎖定專攻年輕及中產嘅選民，極有可能會「空降」新界東及九龍西。佢坦言呢一刻暫時對揀邊區仲係毫無頭緒，但就自爆已約定該黨「幫主」黃毓民下星期坐低就揀區慢慢傾，等佢畀啲意見喎。

任亮憲近月極速冒起，故該黨絕唔會白白派佢去一個冇贏面嘅選區咁嘥料。不過，佢要穩取議席並唔易，一來其他民主派唔會咁筍讓位畀佢，二來喺區選嘅單議席單票制下，單靠人氣嘅任亮憲，亦好難同其他有做開地區工作嘅人士對撼。況且，佢同黨內其他核心成員不咬弦已係公開秘密，故即使佢揀到區，都難得到黨友支持。