中環出更：啟山領軍大勝廣州奧組委
今年係香港小型足球總會成立六十周年，會長霍啟山尋日搞咗個名人邀請賽，由名人隊對廣州奧組委隊。活動星光熠熠，除咗一班前甲組球員之外，仲邀請到廣州市政協主席林元和同埋明星足球隊一齊做嘉賓。啟山透露，自細已經跟爺爺霍英東同任足總會長嘅爸爸霍震霆學踢波，之後去英國讀書都冇放棄過呢項興趣，經常收睇當地嘅聯賽。現場所見，啟山功架十足，更加為名人隊先開紀錄。
陳繁昌囡囡捧場
名人隊中仲有科大校長陳繁昌，佢尋日仲帶埋囡囡出席活動；陳校長提到，自細已經好鍾意踢波，中學時仲做過校隊踢學界賽事，不過近年就踢少咗，改為打網球。觀乎陳校長嘅表現，好肯定佢寶刀未老，一傳一射都有板有眼，佢事後仲話，以前係踢中場做校炮手，唔怪得腳法咁好啦！陳校長囡囡一直喺場邊打氣，陳校長笑笑口話囡囡喺外國做傳媒廣告之類嘅工作，今次返香港係度假，見有時間咪親自到場睇阿爸表演囉。
比賽結果，名人隊以四比一勝出，啟山就當然開心啦，而佢爸爸霍震霆尋日都有到場，爸爸雖然全副武裝，但最終都冇落場。霍震霆雖然只做觀眾，但都不愁寂寞，因兩位老友足總主席梁孔德同董事余錦基都有到場，唔知佢哋三個幾時會真正落場呢？
卓妮