中環出更：伍穎梅「手疊手」男友來頭勁
卓妮尋日報道人稱「九巴金公主」嘅九巴後人伍穎梅（Winnie）墮入愛河，前日同一位成熟穩重嘅男士喺置地廣場Cafe Landmark「手疊手」談心，消息震撼商界，據講Winnie身邊好友紛紛致電祝賀。Winnie男友樣貌似曾相識，卓妮終於想起原來係甚少露面嘅中建企業有限公司董事許晉平。
許世勳姪仔
許晉平大有來頭，係低調富豪許世勳嘅姪仔，即係許晉亨嘅堂阿哥，更加係南華體育會主席許晉奎嘅親兄弟。許晉平目前貴為中建企業董事外，自○三年度起一直擔任大老山隧道有限公司董事局成員，而且樂善好施，○八年就以個人名義捐出五百萬元，賑濟喺四川大地震中受影響嘅災民，當年仲積極支持兒童心臟基金會嘅工作。Winnie搵到個咁好嘅男人，難怪老友都為佢高興。
講番前日Winnie同男友喺Cafe Landmark happy hour到七時許後，就埋單轉場，十指緊扣慢慢步上蘭桂坊，橫過馬路時，男友更加拖到Winnie實一實，睇吓馬路有無車；咁有風度，難怪可以將冰山劈開啦！最後兩人行到協興大廈二樓間「Bistecca」意大利扒房，與友人共進晚餐。
Winnie感情生活一直鎖喺夾萬無人知，究竟呢段戀情開始咗幾耐呢？淨係睇佢哋談心「手疊手」拖足粒半鐘唔放手，相信戀情都係新鮮滾熱辣。卓妮尋日下午喺香港會見到許世勳夫婦食飯後離開，問佢哋點睇呢段戀情，兩人沉默不語，但許世勳上車後卻臉帶微笑，莫非早已知道呢段戀情？
卓妮