正所謂「百年彈指一揮間」，出年就係辛亥革命一百周年喇。講起辛亥革命，香港人都好自豪，孫中山先生早年曾經喺香港求學同埋開展革命活動，屯門紅樓就係先生當年嘅革命基地。其實，香港仲有好多地點同呢場革命息息相關，比如沙頭角葉定仕故居就係其中一個重要遺址。
葉定仕係乜嘢人呀？佢係孫中山先生嘅親密戰友。當年中山先生喺泰國建立中華會、同盟會策劃反清革命，葉定仕就係會內中堅分子，長期為革命出生入死，貢獻好大。當然，最令香港人自豪嘅，係葉先生乃如假包換嘅香港人。
葉先生係沙頭角蓮麻坑村人，呢間故居係佢三十年代由泰國返港定居時起嘅，佢喺度一直住到過身。睇吓間屋，就知道佢同孫中山嘅關係有幾密切喇，磚木結構，中式金字形瓦頂，外牆仲有吉祥圖案壁畫裝飾，直情係翠亨村孫中山先生故居嘅翻版。
孫中山先生領導嘅辛亥革命，推翻滿清王朝，建立亞洲第一個民主共和國，係二十世紀一件大事。香港出咗一個孫中山親密戰友、辛亥革命英雄，係全體香港人嘅光榮，如果喺外國，葉氏故居一早就開闢為紀念館喇。可惜間屋丟空咗四十幾年，葉氏後人早就想捐出嚟做古蹟，點知政府根本唔感興趣。
港英當局咁做仲唔奇，奇嘅係，回歸之後，葉氏後人提出過好幾次，特區政府都當耳邊風，一直拖到舊年年底，古蹟辦先至將故居定為法定古蹟，撥款復修。
咁搞法，間故居就當黑咯！因為日久失修，主樓樓頂同樓板都畀白蟻蛀晒，要用鐵支架撐住，否則隨時冧低。更得人驚嘅係廚房，蝙蝠飛出飛入，旁若無人。唉，好地地一間革命先賢故居，居然淪為蝙蝠竇，辛亥先烈在天有靈，真係死不瞑目。
葉氏故居淪落成咁，其實都唔值得大驚小怪。事關政府不嬲對保育文物後知後覺，文物被糟質嘅畸士多籮籮。港島半山大宅景賢里畀人拆到甩皮甩骨，當局先至急急腳列為暫定古蹟；一代國際巨星李小龍嘅故居竟然淪為時鐘酒店，如果唔係業主主動出錢出地支持活化，渣都冇得剩。
近排發生嘅事仲得人驚，大埔碗窰係中國境內唯一完整保存嘅古瓷器工場，廿幾年前就列為法定古蹟，但日前一場黑色暴雨就滿目瘡痍，古碗古碟被洪水沖到爛溶溶。
仲有，西貢大浪西灣一早就被列為考古遺址，但近日有人喺度大興土木，古蹟辦居然唔知發生乜嘢事。當局廢成咁，先烈故居有乜法子唔變蝙蝠竇呀！
難為當局仲一日呻到黑，話香港冇旅遊景點，吸引唔到外來遊客，真係揸住金飯碗乞食，想唔認敗家仔都難咯。