政情：港府政治觸覺遜濠江
尋日係甘肅舟曲縣泥石流災難嘅全國哀悼日，中央領導人喺北京帶頭為死難者默哀，全國亦都停止公共娛樂活動，以示對生命嘅尊重。澳門官方網頁尋日即刻轉晒黑白色以示哀悼，但港府卻反應遲鈍，官方網站全日色彩繽紛，被市民批評毫無政治觸覺。
港府政治麻木兼不知不覺嘅做法引起民憤，本報尋日接獲讀者投訴指，澳門政府尋日已將官方網頁轉為黑白，又落實暫停公共娛樂活動嘅國策，連世界女排大賽都要讓路。但對比之下，港府顯得好冷漠，港府一站通網站全日仍然跳躍着五顏六色嘅諮詢文件訊息，同宣傳香港參與世博嘅資訊，有關全國哀悼日嘅訊息只出現喺頁面右側嘅新聞欄目，令人感受唔到對逾一千名死難同胞嘅哀悼之情。
甘肅今次災難，港府建築物尋日都下咗半旗同停止尋晚嘅幻彩詠香江致哀，即係做咗基本指定動作，不過唔應該樣樣都要指定至識做，好似網頁變為黑白，澳門特區政府嘅反應明顯快好多，同埋用過心思。