政情：白鴿黨不再「堅定可信」？

白鴿黨副主席單仲偕（雞）尋日同傳媒再三強調，呢個新口號仲未諮詢黨員，未敲定搣甩「堅定可信」唔用。今屆冇做議員嘅雞啱啱喺西灣河成立咗個地區辦事處，話佢唔係為嚟緊嘅選舉鋪路真係冇人信。佢自己亦明言，白鴿黨喺中西區同南區站穩陣腳，偏偏喺人口最多嘅東區卻只得兩個區議員，故唔排除他朝出山，會空降吉位最多嘅東區喎。

講開明年嘅區選，雞話白鴿黨最終應該會派出約百五名黨員迎戰，希望該黨可以比現時嘅六十席攞多十幾廿席；而同泛民各黨協調後，白鴿黨會喺十幾個選區同公社黨對決。

搞領袖計劃爭立會議席

為咗備戰選舉，白鴿黨會舉辦「政治領袖計劃」，供一啲現時唔係、但有意進身立法會嘅黨員加入。佢哋參加計劃之後，不但要做功課，更會接受培訓及甄選，喺參考民調同黨支部評分後，睇吓邊個最後成功跑出代表黨參選。聽講依家有份備戰嘅名單，包括雞本人，該黨「第二梯隊」張賢登、胡志偉、馮煒光、范國威、梁淑楨、任啟邦、柯耀林、李永成、鄭麗瓊等，黨內更有人積極游說普選聯副召集人黃碧雲參選添。

區選同立法會嘅選舉工程已經磨拳擦掌嘞，但白鴿黨對下屆特首選舉就仲未有定案。白鴿黨上屆瞓身支持公文袋梁家傑參選，但雞大嘆今時唔同往日，事關當年前綫極力狙擊小圈子選舉，如今白鴿黨同前綫合併後，點都要尊重番佢哋，喺黨內好好討論吓先；再加上當年係因為煲呔曾冇對手，泛民先焗住派人同佢鍊，但今屆兩個疑似候選人都浮晒上面，故白鴿黨要諗清楚佢哋應該扮演質詢嘅角色，定係繼續派人對決喎。